Forskarar lærer datamaskiner å oppdage falske nyheiter

Men kva er eigentleg falske nyheiter? Og kan vi lære datamaskiner å kjenne dei igjen? Dette skal språkforskar Silje Susanne Alvestad ved Universitet i Oslo, og forskargruppa hennar, prøve å finne ut av.

Falske nyheiter skal få deg til å tru på noko som ikkje er sant

Dei som lagar falske nyheiter, gjer dette for å få lesaren til å tru på noko som ikkje er sant.

Silje forklarer kva som kjenneteiknar falske nyheiter:

– Ei falsk nyheit er løgn, og det kan bevisast at det er løgn. Den som skriv den falske nyheita, lyg med vilje. Den falske nyheita er skriven for å lure lesaren, seier ho.

Datamaskiner kan lære

Språk- og datavitarar frå Universitetet i Oslo og SINTEF samarbeider med forskarar i utlandet for å lære datamaskiner å kjenne igjen falske nyheiter på norsk, engelsk og russisk. Det gjer dei mellom anna ved å kombinere språkforsking og maskinlæring.

Forskarane skal vise datamaskiner mange døme på ekte og falske nyheiter. Etter å ha studert falske nyheiter, har forskarane ein hypotese om kva datamaskina kan sjå etter.

– Vi har ein hypotese om at falske nyheiter til dømes oftare bruker “eg” og sterkare ord og uttrykk, og oftare skriv i notid, seier Silje.

Det er ikkje sikkert at det er så lett, men tanken er at datamaskina skal sjå etter slike forskjellar og etter kvart sjølv klare å kjenne dei igjen. Når ei datamaskin har lært å kjenne igjen ting på denne måten, blir det kalla maskinlæring.

Kan gjere jobben lynraskt

Ei datamaskin som har lært å kjenne igjen forskjellen mellom ekte og falske nyheiter, klarer å gjere denne jobben utruleg mykje fortare enn eit menneske.

Så står det att å sjå om forskarane får dette til!