Drøymer du om å besøkje Mars? Då kan du gle deg over det nye isfunnet til forskarane.
Det kjem ikkje til å bli lett! Likevel vil menneska prøve å sende folk til planeten Mars. Ja, mange ønskjer til og med å lage ein base der oppe, der det går an å bu i lang tid. Men skal vi klare det, må vi finne éin ting der oppe, nemleg vatn!
Heldigvis er ikkje det umogleg. Forskarar har allereie oppdaga isbrear på pola på Mars. Dessutan finst det fukt i sanden under overflata. Nye funn tyder også på at det kan vere flytande, kjempesalt vatn i bakken under sørpolen på Mars. Problemet er berre at det slett ikkje er noko praktisk å lande på polen. Det er heller ikkje noko fint å bu der. Dessutan er vatnet i bakken skittent og vanskeleg å få tak i.
Oppdaga rein, blå is
Men nyleg gjorde nokre forskarar ei nyttig oppdaging. Dei studerte biletet av eit område som ligg meir mot midten av planeten. Der var ein del av sanden grave vekk av kreftene til naturen. Det som stod igjen, var ein over 100 meter høg vegg. Og bileta viser altså at veggen ser ut til å vere laga av rein, blå is!
På toppen ligg eit lag av sand. Men fleire stader er laget tynt. Mars-fararar treng berre å grave ein meter eller to for å komme til isen. Dermed kan dei tine isen for å få vatnet de treng for å overleve.