Svarte hol er heilt usynlege. Men no har romforskarar klart å fotografere eitt av dei likevel.
Svarte hol trekkjer til seg alt som finst i nærleiken. Tyngdekrafta er så sterk at ikkje eingong lyset slepp unna. Det er derfor hola blir kalla svarte. Og ettersom det ikkje kjem noko lys ut av hola, er dei usynlege. Det går heller ikkje an å fotografere dei. Men det går an å ta bilete av det som skjer rundt dei! No har ei gruppe forskarar gjort nettopp det.
Stråling frå hola
Tiltrekkingskrafta får gass og støv til å sirkle rundt det svarte holet. Fortare og fortare. Nærare og nærare. Akkurat som vatnet i badekaret når du trekkjer ut proppen. Den forrykande farten gjer at alt blir frykteleg varmt. Så varmt at mange typar stråling blir sende ut i verdsrommet – alt frå synleg lys til radiobølgjer og røntgenstrålar. Det var denne strålinga forskarane
klarte å fange opp.
Slik gjorde dei det
Forskarane kopla saman åtte kraftige radioteleskop, plasserte ulike stader i verda. Saman fungerte dei som eitt gigantisk teleskop. Det samankopla teleskopet på jorda var så sterkt at ein kunne sett ein appelsin på månen. Det var med dette teleskopet forskarane fotograferte strålinga frå eit svart hol. Holet finst i galaksen Messier 87, 55 millionar lysår frå jorda.