Bjørnar i Japan et kirsebær og bæsjar ut igjen steinane i høgare strøk. Dette hjelper kirsebærtrea å spreie seg høgare opp i terrenget, der det er kjøligare.
I fjella vest for Tokyo står kirsebærtrea i fare for å døy ut fordi det blir for varmt for dei. Bjørnar elskar kirsebær. Dei et dei og ber med seg steinane i magen heilt til dei kjem ut i andre enden. Japanske forskarar ville undersøkje kvar steinane hamna.
Dei plukka kirsebærstein frå bjørnebæsj og fann til si overrasking ut at nesten alle hadde vorte bore høgare opp i terrenget, gjennomsnittleg 307 høgdemeter. Dette er antakeleg fordi den andre maten bjørnen liker å ete, veks lenger oppe i skråningane.
Må ha hjelp
Dette er eit døme på at vandringane til dyra kan hjelpe plantar med å komme seg opp i høgare strøk og slik flykte frå klimaendringane. I motsetning til dyra, kan ikkje plantane sjølv flytte på seg. Dei er derfor avhengige av at nokon andre spreier frøa deira til meir gunstige veksestader.